🎯 ခေါင်းလား ပန်းလား
•••••••••••••••••••• ✍️ ဇို(တီးတိန်)
ကျော်ကြားတဲ့ဂျပန်ဗိုလ်ချုပ်ကြီး နိုဘိုနဂါး(Nobonaga)ဟာ သူ့စစ်သားတွေကို ဦးဆောင်ပြီး တန်ခိုးရှိန်စော်ကြီးမားတဲ့ ရန်သူ့တပ်ကို ချေမှုန်းဖို့ ချီတက်ခဲ့တယ်။
ဗိုလ်ချုပ်ကြီးကတော့ ရန်သူတွေကို အောင်နိုင်မယ်လို့ လုံးလုံးလျားလျား ယုံကြည်ထားတယ်။
ဒါပေမဲ့ သူ့ရဲ့စစ်သားတွေက ကိုယ်စီကိုယ်ငှ စိုးရိမ်ပူပန်နေခဲ့ကြတယ်။
“ကျုပ်တို့ တကယ် တိုက်သင့်တယ်ဆိုတာကော ခင်ဗျားသေချာရဲ့လား ဗိုလ်ချုပ်ကြီး”လို့ စစ်သားတွေက သူ့ကို ထပ်ခါထပ်ခါ မေးကြတယ်။
“ငါတို့တတွေ ခဏရပ်ပြီး ဆုတောင်းကြစို့။
အဲဒီအရာက မှန်ကန်တဲ့ဆုံးဖြတ်ချက်ကို ပေးလိမ့်မယ်”လို့ ဗိုလ်ချုပ်ကြီးက သူတို့ကို ပြောလိုက်တယ်။
တပ်ရင်းတစ်ခုလုံး ဒူးထောက်ပြီး ဆုတောင်းခဲ့ကြတယ်။ ဆုတောင်းတာပြီးသွားတော့ နိုဘိုနဂါးက သူ့လူတွေကို ပြောလိုက်တယ်။
“အခု ငါ အကြွေစေ့တစ်စေ့ကို ခေါင်းပန်းလှန်လိုက်မယ်။
တကယ်လို့ ခေါင်းဆိုရင် ငါတို့ နိုင်ပြီ။
ပန်းဆိုရင်တော့ ငါတို့ ရှုံးပြီ။
ငါတို့ရဲ့ ကံကြမ္မာကို ဖော်ထုတ်ကြစို့”
သူက အကြွေစေ့ကို လှိမ့်လိုက်တယ်။
ဒါကို ကြည့်ဖို့ စစ်သားတွေက ဝိုင်းအုံလာကြတယ်။
ခေါင်းပဲ။
နိုင်ဖို့ သေချာသွားပြီ။
သူတို့အားလုံး စိတ်ဓာတ်ခွန်အားတွေ ပြန်လည် ရရှိခဲ့ကြတယ်။
ဒါ့ကြောင့် သူတို့ရဲ့ ဗိုလ်ချုပ်ကြီးနောက်ကို ကြီးမားတဲ့ ယုံကြည်ချက်တွေ၊ သတ္တိတွေနဲ့ လိုက်ခဲ့ကြတယ်။
တကယ်ပါပဲ။
တိုက်ပွဲမှာ သူတို့တွေ အပြတ်အသတ် အနိုင်ရသွားကြပါတယ်။
ရန်သူတွေက ခွေးပြေးဝက်ပြေး အရေးနိမ့်ခဲ့တယ်။
နောက်တစ်နေ့မှာ သူ့စစ်သားတစ်ယောက်က နိုဘိုနဂါးကို ပြောလိုက်တယ်။
“ဗိုလ်ချုပ်ကြီးရေ… ကံကြမ္မာက ငါတို့ကို မျက်နှာသာပေးခဲ့တယ်နော်”
"ဟုတ်ပါ့ဗျာ။ တကယ်တော့ အကြွေစေ့က ဘက်နှစ်ဘက်မှာ ခေါင်းတွေရှိနေခဲ့တာ"လို့ ထောက်ခံပြောဆိုရင်း
ဗိုလ်ချုပ်ကြီးက နှစ်ဘက်စလုံး ခေါင်းတွေချည်းပါတဲ့ အကြွေစေ့တစ်စေ့ကို ထုတ်ပြလိုက်တယ်။
[မူရင်း။ J.P.Vaswani ၏ Heads or Tails? ကို ပြန်ဆိုသည်။]
No comments:
Post a Comment