🎯 ပန်းသီးစေ့လေးတွေ
••••••••••••••••••••• ✍️ ဇို(တီးတိန်)
စောလုံ(Solon)ဟာ ရှေးခေတ်ဂရိပြည်က တွေးခေါ်ရှင်ကြီးတစ်ဦးဖြစ်ပါတယ်။
တစ်နေ့တော့ စောလုံဟာ လက်ထဲမှာ ပုပ်သိုးဆွေးမြည့်နေတဲ့ ပန်းသီးတစ်လုံးကို ကိုင်ပြီး မြို့သူမြို့သားတွေကြားမှာ လျှောက်သွားနေတယ်။
သူ့ကို ဝိုင်းအုံနေကြတဲ့ လူတွေကို သူ မေးခွန်းတစ်ခု မေးလိုက်တယ်။
"ဒီပန်းသီးကို အသစ်တစ်လုံးဖြစ်အောင် ကျွန်တော် ဘယ်လို လုပ်လို့ရမလဲဆိုတာ ငါ့ကို ပြောပြနိုင်တဲ့သူ ရှိပါသလား"
လူတွေက သူတို့မသိကြောင်း ခေါင်းခါပြကြတယ်။
ဒီဆွေးမြည့်ပုပ်သိုးနေတဲ့ ပန်းသီးတစ်လုံးနဲ့ ဘာလုပ်လို့ရမှာတုံး။ အသစ်တစ်လုံးရအောင် လုပ်နိုင်မတဲ့လား။
အဲဒီလို ကြားမိသူတိုင်းအနေနဲ့ ဒီပန်းသီးဟာ လွှင့်ပစ်လိုက်ရုံပဲ ရှိတော့မှာပေါ့။ ဒီလောက်ပဲလေ။
သူ့မေးခွန်းအတွက် အဖြေမရတော့ စောလုံဟာ ပန်းသီးကို လေးစိတ်စိတ်လိုက်တယ်။
နောက် ပန်းသီးစေ့လေးတွေ ယူပြီး သူတို့ကို ပြောလိုက်တယ်။
"ဒီပုပ်သိုးဆွေးမြည့်နေတဲ့ ပန်းသီးဆီကနေ ပန်းသီးအသစ်တွေ ဖန်တီးဖို့ ဒါမှမဟုတ် ဒီပန်းသီးတွေကို အသစ်ဖြစ်အောင်လုပ်ဖို့ နည်းလမ်းဟာ ဒီအစေ့တွေကို စိုက်ပျိုးဖို့ပါပဲ။ ဒီအစေ့တွေကနေ ပန်းသီးအသစ်ကလေးတွေ သီးပွင့်လာလိမ့်မယ်"တဲ့။
[မူရင်း။ J.P.Vaswani ၏ The Seeds of An Apple ကို ပြန်ဆိုသည်။]
No comments:
Post a Comment