ဆုတောင်း၊ တရားထိုင်ခြင်းအား စိတ်ငြိမ်ဆေးလို စိတ်ငြိမ်ဖို့ သက်သက် ရည်ရွယ်တဲ့ ဆုတောင်းခြင်းဟာ ခရစ်ယာန် ပုံစံ ဆုတောင်းခြင်း မဟုတ်ပါဘူး။

ပုပ်ဖရန်စစ်၏ အပတ်စဉ် ဗုဒ္ဓဟူးနေ့ သွန်သင်ချက်

ကိုးကား

ဗာတီကန် သတင်းဌာန

ပုပ်ဖရန်စစ်သည် ဗုဒ္ဓဟူးနေ့ သွန်သင်ချက်၌ ဆုတောင်းခြင်း အကြောင်းအား ဆာလံကျမ်း အပေါ် ထောက်ရှုခြင်းအားဖြင့် ဆက်လက် သွန်သင်နေသည်။ အဆိုအရ ဘုရားသခင်သည် လက်တွေ့ အရှိတရားအပေါ် အာရုံစိုက်ကြောင်း ဆာလံကျမ်းက ဖော်ပြနေသည်။ 

ဤအပတ်တွင် ပုပ်ဖရန်စစ်သည် ကိုဗစ်-၁၉ ကြောင့် ကမ္ဘာအဝှမ်းနှင့် အီတလီ၌ ရောဂါကူးစက်သူ အရေအတွက် တိုးနေမှု အပေါ် သတိထားကာ လူထုနှင့် နီးနီးစပ်စပ် နှုတ်ဆက်ခြင်းအား မပြုဖြစ်ပေ။ 

ထိုသို့ နီးနီးကပ်ကပ် မနှုတ်ဆက်ဖြစ်သည့် အတွက် 

“သင်တို့ရဲ့ ကျန်းမာရေး ဆိုင်ရာ ဘေးကင်းလုံခြုံဖို့ ခုလို ခပ်ဝေးဝေးကသာ နှုတ်ဆက်ခွင့် ရလို့ စိတ်မကောင်းပါဘူး”ဟု လူထုအား ပြောခဲ့သည်။ 

ထို့အစား ရဟန်းမင်းကြီး မိန့်ကြားရာ နေရာသို့ လာရောက်ကြသူများ အချင်းချင်း ခပ်လှမ်းလှမ်းမှ ရင်းနှီးစွာ နှုတ်ဆက်ကြဖို့ မှာကြားခဲ့သည်။  

ပုပ်ဖရန်စစ်သည် သမ္မာကျမ်းပိုဒ်အား ဖတ်ကြားနေစဉ် အချိန်၌ ပရိသတ် အတွင်းမှ မိခင် တစ်ဦး၏ မိခင်သည် ငိုယိုနေသော လသား အရွယ် ကလေးငယ်အား ချော့သိပ်နေသည်ကို သတိပြုမိလေသည်။ 

“ဘုရားသခင်က ကျွန်တော်တို့ကို မိခင်အမျိုးသမီးက ကလေးငယ်ကို ဆက်ဆံသလိုမျိုး နူးညံ့စွာ ဆက်ဆံပါတယ်၊ မိခင်တစ်ဦးရဲ့ သိမ်မွေ့ညှင်သာမှုဟာ အလွန် လှပတဲ့ ပုံရိပ်ဖြစ်ပြီး ဒီပုံရိပ်ဟာ ကျွန်တော်တို့ လူသားတွေ အပေါ်မှာ ထားတဲ့ ဘုရားသခင်ရဲ့ သိမ်မွေ့ ညှင်သာမှု၊ အမိအသင်းတော်ရဲ့ ပုံရိပ်လည်း ဖြစ်ပါတယ်။ 

“ဘုရားကျောင်း အတွင်း ငိုနေတဲ့ ကလေးတစ်ဦးကို ငိုသံတိတ်ဖို့ မကြိုးစားပါနဲ့၊ ဘာဖြစ်လို့လဲ ဆိုတော့ ဒီလို ကလေးငိုသံဟာ ဘုရားသခင်ရဲ့ သိမ်မွေ့ ညှင်သာမှုကို ဆွဲဆောင်တဲ့ အသံ ဖြစ်လို့ ဖြစ်ပါတယ်။”

လက်တွေ့ အရှိတရားအား ဘုရားရှင်၏ အမြင်ဖြင့် ကြည့်ခြင်း

“ဘုရားမရှိဘူး၊ အတိဒုက္ခရောက်သူ ဆင်းရဲသား မရှိဘူးလို့ ထင်မှတ်ခြင်း မရှိအောင်၊ ဆိုးညစ်သူများရဲ့ စုံစမ်းနှောင့်ယှက်ခြင်း မခံရအောင် ဆာလံကျမ်းက ကျွန်တော်တို့ကို သွန်သင်ပေးနေပါတယ်။

ဆာလံကျမ်းအားဖြင့် ဆုတောင်းခြင်းဟာ ဘဝရဲ့ အခြေခံ အရှိတရား ဖြစ်ပါတယ်၊ ဘာဖြစ်လို့လဲ ဆိုတော့ “ဘုရားရှင်ကို ကြောက်ရွံ့ခြင်း” ဆိုတာဟာ ပြီးပြည့်စုံတဲ့ လူ့အဖြစ်ကို ရစေပါတယ်။ ဆုတောင်းခြင်းအားဖြင့် ကျွန်တော်တို့ ဘဝသက်တာကို “အမြတ်ကြီးစား ခေါင်းပုံဖြတ်ခြင်းနဲ့ လောဘဇောတိုက်တဲ့ ဘဝသက်တာ”မှ ကာကွယ်ပေးပါတယ်။

သို့ပေမယ့် အခြားသူတွေ မိမိကို အထင်ကြီးစေခြင်းနဲ့ မိမိပိုင်ဆိုင်တဲ့ နောက်ဆုံးပေါ် ဖက်ရှင်ကို ကြွားဝါလိုခြင်း စတဲ့ “မှားယွင်းသော ဆုတောင်းခြင်း”ကို သတိပြုဖို့ ယေဇူးသခင်က သတိပေးခဲ့သလို ပုပ်ဖရန်စစ်က မှာပါတယ်။ စစ်မှန်တဲ့ ဆုတောင်းခြင်းကတော့ အမှန်တကယ် ဖြစ်ပျက်နေတဲ့ အရှိတရားကို ဘုရားသခင်ရဲ့ အမြင်အားဖြင့် ကြည့်တတ်ဖို့၊ ထောက်ရှုတတ်ဖို့ အခွင့်အရေး ပေးပါတယ်။ 

ထို့အပြင် ဆုတောင်းရာမှာ ပင်ပန်းကြီးစွာနဲ့ အလွတ်ကျက်ထားတဲ့ မေတ္တာများအား ကြက်တူရွေး နှုတ်တိုက် ရွတ်ခြင်း မပြုဖို့ သတိပေးပါတယ်။ ထို့သို့ ဆုတောင်းမည့် အစား ဆုတောင်းခြင်းကို မိမိ ဘဝသက်တာရဲ့ အလယ် ဗဟိုအဖြစ် နှလုံးသွင်းပြီး နှလုံးသားမှ လာတဲ့ စာသားများဖြင့် ဆုတောင်းရပါမယ်။ 

ဘုရားသခင်နဲ့ ဘုရားသခင် သားသမီးများကို ချစ်မြတ်နိုးသူဟာ ဆုတောင်းတဲ့ အခါမှာ ညီအစ်ကို မောင်နှမနဲ့ နောက်ဆုံး ရန်သူတို့ပင်လျှင် အရေးကြီးလာပါတယ်။ ဘုရားကို လေးစားတန်ဖိုးထာသူဟာ လူသားအပေါင်းကိုလည်း လေးစား တန်ဖိုးထားတတ်လာပါလိမ့်မယ်။ 

ဆုတောင်းခြင်းဟာ ဘဝသက်တာရဲ့ ပူပန်သောကများကို ဖြေလျှော့ပေးတဲ့ စိတ်ငြိမ်ဆေး အဖြစ်လည်း မသတ်မှတ်ရပါဘူး။ ဆုတောင်း၊ တရားထိုင်ခြင်းအားဖြင့် စိတ်ငြိမ်ဖို့ ရည်ရွယ်တဲ့ ဆုတောင်းခြင်းဟာ ခရစ်ယာန် ပုံစံ ဆုတောင်းခြင်း မဟုတ်ပါဘူး။ “ထို့အစား ဆုတောင်းခြင်းဟာ ကျွန်တော်တို့ တစ်ဦး တစ်ယောက်စီကို တာဝန်ယူစိတ် ရှိစေပါတယ်၊ ဒီလို အခြေအနေကို တပည့်တော်ကြီးများအား ယေဇူးသခင် သွန်သင်တော်မူတဲ့ “ကောင်းကင်ဘုံ၌ ဆုတောင်းမေတ္တာ”မှာ တွေ့နိုင်ပါတယ်။ 

ဆုတောင်းခြင်းသည် ဘုရားဝတ်ပြုကျောင်းနှင့် ကမ္ဘာကြီးအား တစုတစည်းတည်း ဖြစ်စေသည်။

ခရစ်ယာန် ထုံးတမ်းအစဉ်အလာ ဓမ္မတေးသီချင်းများဟာ “လူ့ဘဝ အရှိတရားရဲ့ ဒဏ်ရာ အနာတရများမှ သက်သာရာ ရစေပါတယ်၊” ဒီလိုမျိုး လူပုဂ္ဂိုလ်ရင်ထဲက လာတဲ့၊ ပုဂ္ဂိုလ်ရေး ဆုတောင်းခြင်းများဟာ ဗိမာန်တော် ဝတ်ပြုကျောင်းများမှာ၊ ဂျူးဘုရားကျောင်းများမှာ စတင် ရွတ်ဆိုဆုတောင်းခဲ့ကြတာ ဖြစ်ပါတယ်။ ကက်သလစ် အသင်းတော်ရဲ့ သွန်သင်ချက် အရ ဆာလံကျမ်းဟာ “ဗိမာန်ကျောင်း၊ ဘုရားကျောင်းများမှာ ရွတ်ဆိုတဲ့ ဘုရားစာများ အဖြစ်၊ လူ့နှလုံးသားမှ လာသော ဆုတောင်းစာများ” အဖြစ် မှတ်ယူခြင်း ခံရပါတယ်။ 

လူပုဂ္ဂိုလ် ရင်မှ လာတဲ့ ဆာလံ ဆုတောင်းသံများဟာ ကနဦးပိုင်းမှာတော့ အစ္စရေး လူမျိုးရဲ့ ဆုတောင်းမေတ္တာ အဖြစ် အားဖြစ်စေခဲ့ပြီး နှောင်းပိုင်းမှာတော့ အမိအသင်းတော်ရဲ့ ဆုတောင်းမေတ္တာအဖြစ် ခွန်အား ရယူလာခဲ့ပါတယ်။ ဆာလံကျမ်း ဆုတောင်းရာမှာ မိမိကိုယ်တိုင် ဆုတောင်းတဲ့ I ဆိုတဲ့ first person အသုံးအနှုန်းနဲ့ ဖြစ်ပြီး လူတိုင်း အတွက် တောင်းလျှောက်ပေးတဲ့ ဆုတောင်းခြင်း ဖြစ်ပါတယ်။ ခရစ်ယာန် ဆုတောင်းခြင်းဟာ ဗိမာန်ဝတ်ပြုကျောင်းနဲ့ ကမ္ဘာမြေတို့ကို ဆုပ်ကိုင်ထားတဲ့ ဝိညာဉ်ရေး “သက်တာ”လို့ ပြောရင်လည်း ရနိုင်ပါတယ်။ 

“ဆုတောင်းမေတ္တာများဟာ ဘုရားကျောင်းမှာ အစပြုပြီး မြို့ရဲ့ လမ်းမများမှာ လူပုဂ္ဂိုလ်များ ရင်ထဲ အဆုံးသတ်စေပါတယ်။” “အပြန်အလှန်ပါပဲ၊ နေ့တဓူဝ လှုပ်ရှားမှုများမှာ အခြေခံတဲ့ ဆုတောင်းသံများဟာလည်း ဘုရားကျောင်း မစ္ဆားတရားတော်မှာ အဆုံးသတ်ခြင်းအားဖြင့် ပြီးပြည့်စုံတဲ့ အခြေအနေကို ရောက်စေပါတယ်။” ဒါကြောင့် ဘုရားကျောင်း တံခါးဟာ လူအများရဲ့ စိတ်မော လူမော ညီးညူခြင်းများ အားလုံးကို လက်ခံယူတယ်ဆိုတဲ့  ဆိုရိုးစကား ရှိခဲ့တာ ဖြစ်ပါတယ်။ 

ကမ္ဘာကြီးဟာ ဆာလံကျမ်းနဲ့ ဆုတောင်းခြင်းကို အစဉ်တစိုက် လိုအပ်နေမှာ ဖြစ်တယ်လို့ ပုပ်ဖရန်စစ်က ဆိုပါတယ်။ ဆာလံကျမ်း ဆုတောင်းမေတ္တာသည် အားအနည်းဆုံးသူများအတွက် ကယ်တင်ခြင်း ကတိကဝတ် ပေးသလို လောကီရေးရာ ကြွယ်ဝမှုရဲ့ အန္တရာယ်ကိုလည်း အစဉ် သတိပေးနေပါတယ်၊ ဆာလံကျမ်းအားဖြင့် လူ့သမိုင်းကို ဘုရားသခင်ရဲ့ ရှုမြင်ချက်နဲ့ ကြည့်ရှုတတ်စေပါတယ်။ 

ဘုရားသခင်နှင့် ပတ်ဝန်းကျင် လူအပေါင်း အပေါ် ထားသည့် ချစ်စိတ်

“အနှစ်ချုပ်ဆိုရလျှင် ဘုရားသခင်ရှိတဲ့ နေရာမှာ လူဆိုတာ ရှိပါတယ်၊ ကျွန်တော်တို့က ဘုရားကို အရင် ချစ်တာထက် ဘုရားက ကျွန်တော်တို့ကို အရင် ချစ်တာပါ။ ရှင်ယောဟန် ပထမကျမ်းမှာတော့ ဘုရားကိုချစ်ပြီး ကိုယ့် ညီအစ်ကိုမောင်နှမကို မုန်းရင် သူဟာ လူလိမ်လူညာသာ ဖြစ်တယ်၊ မြင်နိုင်တဲ့ ညီအစ်ကိုတောင် မချစ်နိုင်သူဟာ မမြင်နိုင်တဲ့ ဘုရားကို ဘယ်လို ချစ်မလဲလို့လည်း ဖော်ပြထားပါတယ်။”

ဘုရားသခင်ရဲ့ သန့်ရှင်းသော ပုံရိပ်က လူတိုင်းမှာ ကိန်းဝပ်တယ် ဆိုတာကို “ဘုရားမဲ့ ဝါဒ (Atheism)” ငြင်းပယ်တဲ့ အတွက် ဒီလို ဘုရားမဲ့ ဝါဒမျိုးကို ဘုရားသခင်က ထောက်ခံမှာ မဟုတ်ကြောင်း ပုပ်ဖရန်စစ်က ရှင်းပြပါတယ်။ လူအများနဲ့ ကင်းကွာအောင် နေပြီး လူအများကို မုန်းတီးတဲ့ သူဟာ ဘုရားသခင်ကို ယုံကြည်တယ်လို့ ပြောနေတာကလည်း ဘုရားမဲ့ ဝါဒီနဲ့ တူညီပါတယ်။ 

“ဒါက အယူမှားဖြစ်တယ်၊ ပတ်ဝန်းကျင် လူတွေကို မုန်းပြီး ဘုရားကို ချစ်တယ်လို့ ဆိုတာဟာ အဆိုးဝါးဆုံး ပြစ်မှုလို့ ဆိုနိုင်ပါတယ်”လို့ ဆိုခဲ့ပါသည်။

#ဘာသာပြန် #LawrenceLJangmaMungSong

#CatholicInformations

https://www.vaticannews.va/en/pope/news/2020-10/pope-francis-general-audience-prayer-psalms-conclusion-love.html

https://m.facebook.com/story.php?story_fbid=10159000038962445&id=833462444