🎯 အောင်မြင်မှုလျှို့ဝှက်ချက် ၃ ခု
•••••••••••••••••••••••••••• ✍️ ဇို(တီးတိန်)
မုဆိုးတစ်ယောက်ဟာ သူ့ကျော့ကွင်းမှာ ရှားပါးပြီး လှပတဲ့ငှက်တစ်ကောင်ကို ဖမ်းမိသတဲ့။ ဒါနဲ့ အဲဒီငှက်ကို လှောင်အိမ်ထဲ ထည့်လိုက်တယ်။ ရုတ်တရက် ငှက်က သူ့ကို စကားပြောလာတယ်။
“အသင်…မုဆိုးခင်ဗျား…”လို့ သူ့ရဲ့ ချိုမြသာယာတဲ့အသံနဲ့ ပြောလိုက်ပါတယ်။ “ငါဟာ အလွန်သေးငယ်တဲ့ ငှက်တစ်ကောင်ပါ။ ငါ့ဆီကနေ ခင်ဗျား ဘာမှ ရမှာမဟုတ်ဘူး။ ငါ့ကို ရောင်းစားရင်လည်း ခင်ဗျား ပိုက်ဆံ နည်းနည်းပဲ ရမှာ။ ငါ့ကို သတ်စားမယ်ဆိုရင်လည်း အသားတစ်တုံးစာလောက်ပဲရမှာ။ ဒါပေမဲ့ ငါ့ကို ဒီလှောင်အိမ်ထဲကနေ လွှတ်ပေးမယ်ဆိုရင်တော့ ငါ မင်းဆီကို အောင်မြင်မှုလျှို့ဝှက်ချက် သုံးခု လက်ဆင့်ကမ်းပေးမယ်ဗျာ။ အဲဒါတွေကို ခင်ဗျား အမှန်တကယ် လိုက်နာကျင့်ကြံတယ်ဆိုရင် ခင်ဗျားဟာ သေချာပေါက်ကို အောင်မြင်ကြီးပွားချမ်းသာလာမှာ မလွဲပါဘူး”
ဒါနဲ့ ငှက်ကလေးရဲ့ ဉာဏ်နီဉာဏ်နက်ကို ယုံစားမိပြီး မုဆိုးကြီးက ငှက်ကို လှောင်အိမ်ထဲကနေ လွှတ်ပေးလိုက်တယ်။ ငှက်ကလေးကလည်း သစ်ပင်တစ်ပင်ရဲ့ ကိုင်းဖျားပေါ်မှာ ပျံသန်းသွားပြီး နားလိုက်တယ်။ ပြီးတော့ သူကတိပေးထားတဲ့ လျှို့ဝှက်ချက်တွေကို ချက်ချင်း ပြောပြလိုက်တယ်။
“ခင်ဗျားရဲ့ စဉ်းစားဆင်ခြင်ဉာဏ်နဲ့ ဆန့်ကျင်တဲ့အရာမှန်သမျှ ဘယ်တော့မှ ဘယ်တော့မှ ဘယ်တော့မှ လက်မခံမိပါစေနဲ့။ ဒါဟာ ပထမလျှို့ဝှက်ချက်ပဲ။
“ဒုတိယကတော့ ဖိတ်စင်သွားတဲ့ နွားနို့အတွက် ဘယ်တော့မှ မငိုနဲ့။
“ပြီးတော့ တတိယလျှို့ဝှက်ချက်ကတော့ မဖြစ်နိုင်တာကို ရအောင် ဘယ်တော့မှ မကြိုးစားမိစေနဲ့”။
မုဆိုးကြီးဟာ အတော့်ကို ဒေါပွသွားတယ်။
“အစုတ်ပလုတ်ငှက်”လို့ သူက အော်ပစ်လိုက်တယ်။
“ငါ မင်းကို လွှတ်မပေးသင့်ဘူး။ ခင်ဗျားဟာ ဘာမှ အသုံးမကျတဲ့ တိရစ္ဆာန်တစ်ကောင်ပဲ”
“ငါ့ကိုများ အသုံးမကျတဲ့၊ တန်ဖိုးမရှိတဲ့ကောင်ဟုတ်လား”လို့ ငှက်က ပြန်အော်တယ်။
“ခင်ဗျား ငါ့ရင်ကို ခွဲရင် စိန်တစ်လုံး တွေ့ပါလိမ့်မယ်”
မုဆိုးဟာ လောဘတွေနဲ့ မွှန်ထူနေပြီ။ ဒါနဲ့ သစ်ပင်ပေါ်ကို ခုန်လိုက်တယ်။ ပြီးတော့ အကိုင်းအခက်တွေအားလုံးကို ကုတ်ချိတ်ပြီး တက်သွားတယ်။ ငှက်ကလေးကတော့ အမြင့်ကို ပျံတက်သွားတယ်။ သူ ဘယ်လိုမှ ငှက်ကို မဖမ်းနိုင်တော့ဘူး။ နောက်ဆုံး သစ်ပင်ပေါ်ကနေ အောက်ကို သူ ပြုတ်ကျသွားတယ်။ သူ့ခြေတစ်ဖက် ကျိုးပြီး တစ်ကိုယ်လုံး ဒဏ်ရာရသွားတယ်။
“ခင်ဗျားဆီ အဲဒီအောင်မြင်မှုလျှို့ဝှက်ချက်သုံးခုကို ငါ ပြန်ရွတ်ပြမယ်။
“ခင်ဗျားရဲ့ စဉ်းစားဆင်ခြင်ဉာဏ်နဲ့ ဆန့်ကျင်တဲ့အရာတွေကို ဘယ်တော့မှ မယုံပါနဲ့လို့ ငါ ပြောသားပဲ။ သူ့အသည်းနှလုံးထဲမှာ စိန်တစ်လုံးရှိနေတဲ့ ငှက်တစ်ကောင်အကြောင်း ဘယ်သူ ကြားဖူးလို့တုန်း။ ပထမဥပဒေသကို ခင်ဗျား မလိုက်နာဘူးဘဲ”
“ဖိတ်စင်သွားတဲ့ နွားနို့အတွက် မငိုနဲ့ဆိုတာ ငါ မင်းကို ပေးခဲ့တဲ့ ဒုတိယဥပဒေသပဲ။ မင်း ငါ့ကို လှောင်အိမ်ထဲက လွှတ်ပေးခဲ့တယ်။ နောက်တော့ ခင်ဗျား နောင်တရသွားတယ်။ ဘယ်လောက် အလဟဿဖြစ်သွားတဲ့လုပ်ရပ်လဲ”
“တတိယဥပဒေသ…အို အသင်မုဆိုးခင်ဗျား…မဖြစ်နိုင်တာကို ဘယ်တော့မှ မကြိုးစားပါနဲ့ဆိုတာလေ။ အခု မင်းကိုယ်မင်း ပြန်ကြည့်။ သစ်တစ်ပင်ပေါ်က ငှက်ကို ဖမ်းဖို့ ခင်ဗျား ကြိုးစားကြည့်တယ်။ အခုတော့ ခြေထောက်တစ်ဖက် ကျိုးသွားတာပဲ အဖတ်တင်တယ်။ ခင်ဗျား မဖမ်းမိဘူးမဟုတ်လား”
“ငါ အချိန် စေ့ပြီ။ ငါ အဝေးကို ပျံထွက်သွားတော့မယ်”လို့ ပြောပြီး ငှက်က သူ့စကားကို အဆုံးသတ်လိုက်တယ်။
“တကယ်တော့ မင်းဟာ ငါ သင်ပေးလိုက်တဲ့ အောင်မြင်ရေးလျှို့ဝှက်ချက်တွေကနေ ဘာအကျိုးအမြတ်မှ မရလိုက်ဘဲကိုး”တဲ့။
[မူရင်း။ J.P.Vaswani ၏ Three Secrets of Success ကို ပြန်ဆိုသည်။]
No comments:
Post a Comment