အောက်တိုဘာ ၂၃ ရက်၊ ၂၀၂၀၊ သောကြာနေ့၊ သာမန်ကာလ ၂၉ ပတ်မြောက်။

ဧဖက်ဆု 4: 1-6

1. ထို့ကြောင့် သင်တို့သည် မိမိတို့ခံယူရရှိသောခေါ် တော်မူခြင်းနှင့်ထိုက်တန်သည့်ဘ၀အသက်တာကို လိုက်နာကျင့်ကြံကြမည့် အကြောင်း သခင်ဘုရားအတွက် အကျဉ်းသားဖြစ်သော ငါသည် တိုက်တွန်းနှိုးဆော်လိုက်ပါ၏။

- 2. ထိုသို့ကျင့်ကြံရာတွင် စိတ်နှိမ့်ချခြင်း၊ နူးညံ့သိမ်မွေ့ခြင်း၊ စိတ်ရှည်သည်းခံခြင်းနှင့် တစ်ဦးကိုတစ်ဦးချစ်ခြင်းမေတ္တာဖြင့် အနစ်နာခံခြင်းစသည်တို့ကို တတ်အားသရွေ့ ပြုမူကျင့်ကြံကြလျက်၊

- 3. သင်တို့အား ချည်နှောင်ထားသော ငြိမ်းချမ်းသာယာခြင်းအားဖြင့် ဝိညာဉ်တော်၌ ပေါင်းစည်းနေခြင်းကို ထိန်းသိမ်းကြရန် စိတ်အားထက်သန်စွာ ကြိုးစားအားထုတ်ကြလော့။

- 4. သင်တို့သည် သင်တို့၏ခေါ်တော်မူခြင်းနှင့်သက်ဆိုင်သည့် တစ်ခုတည်းသောမျှော်လင့်ခြင်းသို့ ခေါ်တော်မူခြင်းခံကြရသည့် နည်းတူ ကိုယ်ခန္ဓာတစ်ခု၊ ဝိညာဉ်တော်တစ်ပါး၊

- 5. သခင်တစ်ပါး၊ ယုံကြည်ခြင်းတစ်ပါး၊ ဆေးကြောခြင်း တစ်ပါးတည်းသာ ရှိတော်မူ၏။

- 6. ထို့အတူ ငါတို့အားလုံး ၏အဖဖြစ်သော ဘုရားသခင်တစ်ပါးတည်းသာရှိတော်မူ၏။ ကိုယ်တော်သည် အရာခပ်သိမ်းတို့ကို အုပ်စိုး၍ ၎င်းတို့အားဖြင့် လုပ်ဆောင်ပြီး ၎င်းတို့အလယ်တွင် တည် ရှိတော်မူ၏။ 

**************

ရှင်လုကာ 12: 54-59

(ခေါတ်ကာလကိုပိုင်းခြားသိမြင်ခြင်း)

54. ထို့နောက် ကိုယ်တော်သည် လူအစုအဝေးတို့ကိုလည်း မိန့်တော်မူသည်ကား အနောက်အရပ်မှ မိုးတိမ်တက်လာသည်ကို သင်တို့မြင်ကြသောအခါ မိုးရွာလိမ့်မည်ဟု သင်တို့ချက်ချင်း ပြောတတ်ကြ၏။ ထိုအတိုင်းလည်းဖြစ်၏။

- 55. တောင်လေ တိုက်ခတ်လာသည်ကို သင်တို့မြင်ကြသောအခါ နေအလွန်ပူလိမ့်မည်ဟု သင်တို့ ပြောတတ်ကြ၏။ ထိုအတိုင်းလည်းဖြစ်လေ၏။

- 56. အသင် သူတော်ကောင်းယောင်ဆောင်သူတို့၊ သင်တို့သည် ကောင်းကင်နှင့် ကမ္ဘာမြေကြီး၏ အသွင်အပြင်ကို သိမြင် ပြောဆိုနိုင်ကြပါလျက် ယခုခေတ်ကာလကို အဘယ်ကြောင့်ပိုင်းခြား၍မသိနိုင်ကြသနည်း။

57. မှန်ကန်သောအမှုအရာကို အဘယ်ကြောင့် သင်တို့ကိုယ်တိုင် မဆုံးဖြတ်ကြသနည်း။

(တရားတွေ့ဖက်နှင့်ကြေအေးစေခြင်း)

- 58. သင်သည် သင်၏ တရားပြိုင်ဘက်နှင့်အတူ တရားသူကြီးထံသို့သွားနေစဉ် သူနှင့်ကြေအေးမှုရအောင် လမ်းတွင် ကြိုးပမ်း အားထုတ်လော့။ ထိုသို့မပြုလျှင် သူသည် သင့်ကို တရားသူကြီးထံသို့ ဆွဲ၍ခေါ်သွားသဖြင့် တရားသူကြီးသည် သင့်ကို မင်း မှုထမ်း၏ လက်သို့အပ်လိမ့်မည်။ မင်းမှုထမ်းသည်လည်း သင့်ကို ထောင်ထဲ၌ ချထားလိမ့်မည်။

- 59. သင့်အား ငါဆိုသည်ကား သင်ပေးဆပ်ရမည့်ငွေကို အကုန်အစင်မပေးမချင်း သင်သည် ထောင်ထဲမှထွက်ရလိမ့်မည် မဟုတ်ဟု မိန့်တော်မူ၏။ 

===============

ထောက်ရှုချက်

"ခေါ်တော်မူခြင်းနှင့်ထိုက်တန်သောဘဝ"

" သင်တို့သည် မိမိတို့ခံယူရရှိသောခေါ် တော်မူခြင်းနှင့်ထိုက်တန်သည့်ဘ၀အသက်တာကို လိုက်နာကျင့်ကြံကြမည့်အကြောင်း ငါတိုက်တွန်းနိုးဆော်ပါ၏။"

(ဧဖက်ဆု 4: 1)

🍑- ခေါ်တော်မူခြင်း

၁) ခရစ်ယန်အသက်တာဆိုင်ရာခေါ်တော်မူခြင်း

- ခရစ်ယန်တိုင်းဟာ ခရစ်တော်ကိုပုံအတုယူပြီး ဘဝအသက်တာရှင်သန်ဖို့ ဖိတ်ခေါ်ခံရပါတယ်။

- ခရစ်တော်ဟောပြောသွန်သင်ခဲ့သမျှတို့ကိုလည်းလိုက်ကျင့်ကြမှသာ ခရစ်ယန်ပီသကြမှာဖြစ်ပါတယ်။

၂) မိမိလက်ရှိရယူထားသောဘဝနှင့်ဆိုင်သောခေါ်တော်မူခြင်း

- ခေါ်တော်မူခြင်း ဆိုတဲ့စကားကိုကြားရင် ပုံမှန်အားဖြင့် ရဟန်းသီလရှင်ဘဝကို ဖိတ်ခေါ်ခံရတာကိုပဲဆိုလိုခြင်းလို့ပဲနားလည်တတ်ပါတယ်။ အမှန်တော့ အဲ့ဒါထက်ပိုပါတယ်။

- လူတိုင်းနဲ့သက်ဆိုင်ပါတယ်။ ယခု သင်လက်ရှိရယူထားတဲ့ဘဝဟာ လည်းဘုရားရှင်ကသင်ကိုခေါ်ထားတဲ့ဘဝအသက်တာဖြစ်ပါတယ်။

🌻 - လူတိုင်းက မိမိလက်ရှိရယူထားတဲ့ဘဝကို ထိုက်တန်စွာရှင်သန်ရပါ့မယ်။

🔹 ဘုန်းတော်ကြီးက ဘုန်းကြီးတစ်ပါးနဲ့ထိုက်တန်တဲ့ဘဝ

🔹 သီလရှင် ကသီလရှင်တစ်ပါနဲ့ ထိုက်တန်တဲ့ဘဝ

🔹 ကျောင်းဆရာက ကျောင်းဆရာနဲ့ထိုက်တန်တဲ့ဘဝ

🔹 ကျောင်းသားက ကျောင်းသားနဲ့ထိုက်တန်တဲ့ဘဝ

🔹 သမ္မတက သမ္မတနဲ့ထိုက်တန်တဲ့ဘဝ

🔹 စစ်ဗိုလ်ချုပ်ကလည်း စစ်ဗိုလ်ချုပ်နဲ့ထိုက်တန်တဲ့ဘဝ

🔹 ဆရာဝန်က ဆရာဝန်နဲ့ထိုက်တန်တဲ့ဘဝ

🔹 တောင်သူလယ်သမားက မိမိနဲ့ထိုက်တန်တဲ့ဘဝ

🔹 စျေးသည်က စျေးသည်နဲ့ထိုက်တန်တဲ့ဘဝ

🔹 ခင်ပွန်းသည်က ခင်ပွန်းနဲ့ထိုက်တန်တဲ့ဘဝ

🔹 ဇနီးသည်သ ဇနီးနဲ့ထိုက်တန်တဲ့ဘဝ

🔹 မိမိက မိဘနဲ့ထိုက်တန်တဲ့ဘဝ

🔹 သားသမီးကလည်း သားသမီးနဲ့ထိုက်တန်တဲ့ဘဝ

- ဖြစ်ဖို့ကြိုးစားကြရမှာဖြစ်ပါတယ်။

💗 ထိုသို့ကျင့်ကြံရာတွင်

- စိတ်နှိမ့်ချခြင်း၊

- နူးညံ့သိမ်မွေ့ခြင်း၊

- စိတ်ရှည်သည်းခံခြင်းနှင့် 

- တစ်ဦးကိုတစ်ဦးချစ်ခြင်းမေတ္တာဖြင့် အနစ်နာခံခြင်းစသည်တို့ကို တတ်အားသရွေ့ ပြုမူကျင့်ကြံကြလော့။ (ဧဖက်ဩဝါဒစာ 4: 2)

ထောက်ရှုရန်မေးခွန်း

၁) ကျွန်ုပ်သည်မိမိနှင့်ဆိုင်သောခေါ်တော်မူခြင်းအသက်တာကို ကောင်းစွာ၊ တာဝန်ကျေစွာ ရှင်သန်ပါ၏လော။

၂) ကျွန်ုပ်သည်ခရစ်တော်ကို ပုံတုယူလျက်လိုက်ကျင့်ရသော ခရစ်ယန်အသက်တာကို ကောင်းစွာရှင်သန်ပါ၏လော။

တောင်းဆု

အိုမေတ္တာတော်ရှင်အဖဘုရား တပည့်တော်သည် မိမိအားကိုယ်တော်ပေးသနားထားသည့် မိမိဘနှင့်ဆိုင်ရာ ခေါ်တော်မူခြင်းအသက်တာကို ကောင်းစွာရှင်သန်နိုင်ရန် ကျေးဇူးခွန်အားပေးသနားပါဘုရား။

Credit to Bosco Saw